पाल्पा । रिब्दीकोट गाउँपालिकाले सामाजिक सुरक्षा र स्वास्थ्यको पहुँच सबैसम्म पुगोस् भन्ने उद्देश्यका साथ पहिलो चरण अन्तर्गत अति विपन्न, दलित तथा “ग” वर्गका अपाङ्ग परिवारका सदस्यहरूको निःशुल्क स्वास्थ्य बीमा सम्पन्न गरेको छ। गाउँपालिकाका ८ वटै वडाका ५१९ घरपरिवारका नागरिकको कुल रु. १९ लाख ६२ हजार ४०० बराबरको स्वास्थ्य बीमा गरिएको हो। गाउँपालिकाले यसलाई “अध्यक्षसँग स्वास्थ्य बीमा कार्यक्रम” अन्तर्गत आफ्ना नियमित सामाजिक उत्तरदायित्वका रूपमा अघि सारेको हो।
कार्यक्रम गाउँपालिकाको चालू आ.व. २०८२/०८३ को स्वीकृत योजनाअन्तर्गत सञ्चालन गरिएको हो। सबै वडामा वडा अध्यक्षज्यूहरूको अध्यक्षता र गाउँपालिका अध्यक्ष नारायण बहादुर काकी ज्यूको प्रमुख आतिथ्यता तथा उपाध्यक्ष कान्ता अधिकारी ज्यूको विशिष्ट आतिथ्यतामा सम्पन्न भएको कार्यक्रममा प्रमुख प्रशासकीय अधिकृत सुरेश भुषाल, स्वास्थ्य शाखा प्रमुख तथा बीमा कार्यान्वयन समिति सदस्य सचिव सुनिल अधिकारी, समितिका सदस्य, वडा सदस्यहरू, जनप्रतिनिधि तथा लक्षित वर्गका नागरिकहरूको उत्साहजनक सहभागिता रहेको थियो।
स्वास्थ्य शाखा प्रमुख सुनिल अधिकारीले गाउँपालिकाले सुरु गरेको यो बीमा कार्यक्रम केवल आर्थिक सहयोग नभई “स्वास्थ्य सुरक्षा र सामाजिक न्याय” सँग जोडिएको गम्भीर कदम भएको बताए।“अति विपन्न, दलित र अपाङ्ग वर्गलाई बीमामा समेट्नुले गाउँपालिकाको समावेशी सोच र नागरिकप्रतिको संवेदनशीलता देखाउँछ। बीमाले नागरिकलाई उपचार खर्चको बोझबाट मुक्त गर्छ, नियमित स्वास्थ्य परीक्षण गर्न प्रेरित गर्छ र स-साना रोगकै समयमा उपचार सम्भव हुन्छ। यसले दीर्घकालीन रूपमा स्वस्थ र सशक्त समाज निर्माणमा योगदान पुर्याउँछ,” अधिकारीले बताए।
त्यस्तै, प्रमुख प्रशासकीय अधिकृत सुरेश भुषालले गाउँपालिकाले योजनाबद्ध रूपमा तथ्यांक संकलन गरी लक्षित वर्ग पहिचान गरेको जानकारी दिँदै भने,“यो केवल एउटा सुरुवात हो। बाँकी बीमा नभएका नागरिकहरूलाई पनि आगामी चरणमा समावेश गर्ने हाम्रो तयारी छ। बीमालाई निरन्तरता दिन गाउँपालिकाले स्थानीय स्वास्थ्य संस्थासँग सहकार्य गरेर स्थायी अभियानको रूपमा अघि बढाउनेछ। स्वास्थ्य बीमा हरेक नागरिकको अधिकार हो भन्ने अवधारणालाई व्यवहारमा उतार्न हामी प्रतिबद्ध छौं।”
विशिष्ट अतिथि तथा उपाध्यक्ष कान्ता अधिकारीले स्वास्थ्य क्षेत्रलाई विकासको मेरुदण्डका रूपमा परिभाषित गर्दै भनिन्,“स्वस्थ नागरिक नै समृद्ध गाउँको आधार हो। विपन्न, दलित र अपाङ्ग नागरिकका लागि निःशुल्क स्वास्थ्य बीमा गर्नु केवल सहयोग होइन, यो आत्मनिर्भर र सशक्त जीवनतर्फको यात्रा हो। हामीले सुरु गरेको यो अभियानलाई निरन्तरता दिँदै बाँकी सबै नागरिकलाई पनि बीमाको पहुँचमा ल्याउने हाम्रो दृढ प्रतिबद्धता छ।”
कार्यक्रमका प्रमुख अतिथि तथा गाउँपालिका अध्यक्ष नारायण बहादुर काकीले रिब्दीकोट गाउँपालिकाले सदैव नागरिकको जीवनस्तर उकास्ने र समान अवसर दिने उद्देश्यका साथ कार्य गर्दै आएको बताए।“स्वास्थ्य बीमा कार्यक्रम हाम्रो पालिकाको फरक र उदाहरणीय पहल हो। कुनै पनि नागरिक उपचार नपाएर पीडित नहोस् भन्ने हाम्रो मुख्य सोच हो। अबको लक्ष्य हरेक नागरिकलाई स्वास्थ्य बीमाबाट लाभान्वित बनाउने हो,” अध्यक्ष काकीले बताए।
उहाँले थप्दै भने, “यो सेवा निरन्तर रूपमा आगामी वर्षहरूमा पनि सञ्चालन गरिनेछ। हाम्रो लक्ष्य हरेक घरमा स्वास्थ्य सुरक्षा र हरेक नागरिकमा उपचारको आत्मविश्वास स्थापना गर्नु हो।”
रिब्दीकोट गाउँपालिकाले पहिलो चरणमा ५१९ घरपरिवारलाई निःशुल्क बीमामा समेट्दै स्वास्थ्य सुरक्षाको दिशामा ठोस कदम चालेको छ। अब पालिकाले दोस्रो चरणमार्फत बाँकी सबै नागरिकलाई पनि बीमाको दायरामा ल्याउने तयारी गरेको छ, जसले गाउँपालिकालाई “सबैका लागि स्वास्थ्य बीमा, सबैका लागि सुरक्षित जीवन” अभियानतर्फ अघि बढाउनेछ।
