तानसेन ।उपप्रधानमन्त्री एवम् सहरी विकास मन्त्री प्रकाशमान सिंहले अहिलेको सरकार पूर्ण रूपमा विकास र जनताको हितमा केन्द्रित रहेको बताउनु भएको छ । पत्रकार महासंघ पाल्पाले गरेको पत्रकार भेटघाट कार्यक्रममा बोल्दै उहाँले सरकारका सबै कार्यक्रम र नीति जनताको जीवनस्तर सुधार र मुलुकको समृद्धि सुनिश्चित गर्न लक्षित रहेको बताउनु भएको छ ।
कार्यक्रममा बोल्दै उहाँले सरकार विकास निर्माणका परियोजनाहरूलाई तीव्रता दिन प्रतिबद्ध रहेको उल्लेख गर्नुभयो ।
सिंहका अनुसार, मुलुकको समृद्धि सुनिश्चित गर्न सरकारले पूर्वाधार विकास, शहरीकरण व्यवस्थापन र स्थानीय विकासका योजनाहरूलाई विशेष प्राथमिकता दिइरहेको छ। उहाँले विकासका योजनाहरू प्रभावकारी रूपमा कार्यान्वयन गर्न तीनै तहका सरकारबीच समन्वय आवश्यक रहेको बताउनु भयो ।
पत्रकारहरूसँगको कुराकानीका क्रममा उपप्रधानमन्त्री सिंहले अहिलेको सरकार आएपछि सेवा प्रवाहलाई प्रभावकारी बनाउन कानुनी संरचना र नीति सुधार गरेर अगाडी बढेको उल्लेख गर्नुभयो । हाम्रो ध्यान अब सेवा प्रवाहलाई चुस्त बनाउँदै विकास निर्माणका कार्यलाई तीव्रता दिनु हो, मन्त्री सिंहको भनाई थियो ।
पूर्वविशिष्ट व्यक्तिहरूलाई सुरक्षा, सरकारी आवास, गाडी र अन्य सुविधा दिने विषयमा पत्रकारहरुको प्रश्नमा यस विषयमा कुनै निर्णय नभएको बताउनुभयो ।पत्रकार महासंघका जिल्ला अध्यक्ष कमलराज तिमिल्सेनाको अध्यक्षता, सचिव रामचन्द्र रायमाझीको सञ्चालनमा कार्यक्रम भएको थियो ।
