पाल्पा – राष्ट्रप्रेमी सुशिल बस्यालले त्रिभुवन बहुमुखी क्याम्पस, तानसेनलाई राष्ट्रिय झण्डा हस्तान्तरण गरेका छन् । राष्ट्रिय एकता र पहिचानको प्रतीक स्वरूप उनले आफू अध्ययनरत क्याम्पसमा झण्डा राखी देशभक्तिको सन्देश फैलाउने प्रयास गरेका हुन् । बस्याल ‘एक घर, एक लालीगुराँस’ अभियानका अभियन्ता तथा स्वतन्त्र विद्यार्थी युनियन (स्ववियु) का सदस्य समेत हुन्।
पाल्पाको बग्नासकाली गाउँपालिका–८, बराङ्दीस्थित बेलौतिखरक निवासी बस्यालले आफ्नो राष्ट्रिय अभियानलाई निरन्तरता दिँदै झण्डा हस्तान्तरण गरेका हुन् । उनका अनुसार हरेक शैक्षिक संस्थामा राष्ट्रिय झण्डा राखिनु आवश्यक छ, जसले विद्यार्थीमा राष्ट्रप्रेम र जिम्मेवारीको भावना जागृत गर्ने बताए । झण्डा हस्तान्तरण कार्यक्रममा क्याम्पस प्रमुख टंक पन्थ, सहायक क्याम्पस प्रमुख सन्तोष ज्ञवाली, विज्ञान संकाय सहायक क्याम्पस प्रमुख चन्द्रबहादुर थापा, तानसेन नगरपालिकाका कार्यपालिका सदस्य दिनेश गन्धर्व, स्ववियु सभापति कृष्ण अर्याल लगायत विद्यार्थी, शिक्षक तथा कर्मचारीको उपस्थिति रहेको थियो ।
राष्ट्रप्रेमी बस्यालले राष्ट्रिय झण्डाको महत्त्वबारे चर्चा गरे । उनले भने, “राष्ट्रिय झण्डा केवल कपडाको टुक्रा मात्र होइन, यो हाम्रो अस्तित्व, स्वाभिमान र पहिचानको प्रतीक रहेको बताए । देशको इतिहास, संघर्ष र गौरवलाई झल्काउने यो झण्डा हरेक शैक्षिक संस्थामा फहराइनु आवश्यक रहेको बताए । राष्ट्रिय झण्डाले विद्यार्थीलाई देशप्रति गर्व गर्ने भावना विकास गर्न प्रेरित गर्ने बताउदै निकट समयमा नै विज्ञान संकायकाे बतासेडाडामा पनि झण्डा राख्ने प्रतिबद्धता व्यक्त गरे । बस्यालको अभियानलाई क्याम्पस प्रशासनले प्रशंसा गरेको छ ।क्याम्पस प्रमुख टंक पन्थले विद्यार्थीहरूले यस्ता राष्ट्रप्रेमी अभियानलाई आत्मसात गर्नुपर्ने बताए । क्याम्पसलाई झण्डा हस्तान्तरण गरेर बस्यालले उदाहरणीय काम गरेकाे बताउदै यो कदमले राष्ट्रिय गौरवलाई बलियो बनाउन मद्दत गर्ने बताए ।
राष्ट्रिय झण्डाको महत्त्वबारे प्रकाश पार्दै बस्यालले भने, “नेपालको झण्डा संसारकै अनौठो झण्डा हो, यसको आकार, डिजाइन र अर्थ गहिरो रहेको बताए । सूर्य र चन्द्रको प्रतिकले नेपाल सधैं रहने राष्ट्र हो भन्ने दर्शाउँछ। हामीले यसको सम्मान गर्नुपर्छ। बस्यालको अभियानले तानसेनका अन्य शैक्षिक संस्थाहरुलाई पनि प्रेरित गर्ने अपेक्षा गरिएको छ । उनले आगामी दिनमा अन्य विद्यालय तथा कलेजहरूमा पनि झण्डा हस्तान्तरण गर्ने योजना बनाइरहेको जानकारी दिए ।
यस अभियानले राष्ट्रिय भावना फैलाउने मात्र होइन, युवा पुस्तालाई आफ्नो पहिचान र जिम्मेवारीबारे सचेत गराउने काम गरेकाे तानसेन नगरपालिकाका कार्यपालिका सदस्य दिनेश गन्धर्वले बताए । राष्ट्रप्रेमी बस्यालको यो प्रयासले अन्य शैक्षिक संस्थाहरूलाई पनि राष्ट्रिय झण्डा राख्ने प्रेरणा दिने विश्वास व्यक्त गरे ।
सम्बन्धित खवर
