पाल्पा, अन्धकारमुक्ति बचत तथा ऋण सहकारी संस्था रामपुर पाल्पाले रामपुर अस्पताल संगै इलाका प्रहरी कार्यालयलाई न्यानो कपडा प्रदान गरेको छ । सहकारीले स्थापना दिवसको अवसरमा शनिबार अस्पतालको वेड र प्रहरी कार्यालयको हिरासत कक्षको लागि बलाङ्केट वितरण गरेको हो ।
सहकारीले रामपुर अस्पतालको लागि १० थान र इलाका प्रहरी कार्यालय रामपुरको लागि तीन थान बलाङ्केट प्रदान गरेको जनाएको छ । सञ्चालक समिति र कर्मचारीहरुको उपस्थितिमा संस्थाका अध्यक्ष सागर प्रसाद देवकोटाले रामपुर अस्पताल विकास समितिका अध्यक्ष राम प्रसाद ढकाल रमेश र अस्पतालका निमित्त मेडिकल सुपरिटेण्डेन्ट डा. अमिर काफ्लेलाई न्यानो कपडा प्रदान गर्नु भएको थियो । सहकारीका अध्यक्ष देवकोटाले अस्पतालको आवश्यकता र उपचारका लागि आउने विरामीहरुको सहजतालाई मध्यनजर गर्दै बलाङ्केट वितरण गरिएको बताउनुभयो ।
कार्यक्रमको बारेमा जानकारी दिदै संस्थाका उपाध्यक्ष खगेन्द्र प्रसाद न्यौपाने विगतमा औपचारिक रुपमा अन्य कार्यक्रम सञ्चालन गर्दै आए पनि यस पटक देखि रचनात्मक कार्यको थालनी गरिएको बताउनुभयो । रामपुर अस्पताल विकास समितिका अध्यक्ष रामप्रसाद ढकाल रमेशले सहकारीले वित्तिय सेवा संगै सामाजिक उत्रदायित्व अन्तर्गतको कार्यक्रम अस्पतालमा सञ्चालन गर्दै आएकोमा आभार व्यक्त गर्नुभयो । विरामीले भोग्ने दुःख संग संस्थालाई जोड्ने प्रयत्न गरेकोमा धन्यवाद दिनुभयो ।
सहकारीका सञ्चालक समिति र कर्मचारीहरुले अस्पतालमा रहेका विरामीलाई फलफूल समेत प्रदान गरेको संस्थाका व्यवस्थापक दिपेन्द्र प्रसाद पौडेलले जानकारी दिनुभयो । सहकारीले यस अघि अस्पतालको परिसरमा प्रतिक्षलय समेत निर्माण गरेको थियो । इलाका प्रहरी कार्यालय परिसरमा भएको कार्यक्रममा बोल्दै सहकारकिा अध्यक्ष देवकोटाले प्रहरी संगको साझेदारीमा संस्थाले थप कार्यक्रम सञ्चालन गर्ने योजना बनाएको जानकारी दिदै अहिले हिरासतमा पर्ने व्यक्तिहरुका लागि बलाङ्केट वितरण गरिएको बताउनुभयो ।
इलाका प्रहरी कार्यालय रामपुरका प्रहरी निरीक्षक राम बहादुर नेपालीले पुरुष हिरासत कक्षमा धेरै व्यक्ति भएको समयमा व्यवस्थापनमा समस्या हुने भएकाले न्यानो कपडाले थप सहज हुने बताउनुभयो । साथै हिरासतको स्तर सुधारमा समेत राहत हुने बताउँदै सहकारीलाई धन्यवाद ज्ञापन गर्नुभयो । अन्धकारमुक्ति साकोसका अध्यक्ष सागर प्रसाद देवकोटाको अध्यक्षतामा भएको कार्यक्रमको सञ्चालन संस्थाका सचिव ओम प्रकाश बस्यालले गर्नु भएको थियो ।
सम्बन्धित खवर
