सुशीला रेग्मी
रामपुर (पाल्पा) । युवा स्वरोजगार कार्यक्रममार्फत युवाले विभिन्न व्यवसाय गरेर आत्मनिर्भर बन्दै गएका छन् । रामपुर नगरपालिकाले विदेश गएर फर्केका र विदेश जान लागेका युवालाई लक्षित गरी युवा स्वरोजगार कार्यक्रममार्फत व्याज अनुदान कार्यक्रम सञ्चालन गरिरहेको छ ।
यस कार्यक्रमबाट युवाले विभिन्न व्यवसायमा आबद्ध भएर आयआर्जनमा लागेका छन् । यस कार्यक्रमबाट ९७ युवा लाभान्वित भएका छन् । हालसम्म रु १ करोड ११ लाख ६९ हजार ८२८ बराबरको रकम लगानी गरिएको छ ।
यस आर्थिक वर्षमा नगरभित्रका ४४ जना युवालाई कार्यक्रममा छनौट गरिएको छ । तरकारी, फलफुल खेती, संरचनाभित्र तरकारी खेती/तरकारी वा फलफुल वा पुष्प नर्सरी, कुखुरापालन (ब्रोइलर), कुखुरापालन (स्थानीय, लेयर्स, हास लगायत अन्य पंक्षीपालन), माछापालन, बाख्रापालन, मौरीपालन, च्याउ खेति, बंगुरपालन, गाईभैसीपालन व्यवसाय गर्नका लागि नगरपालिकाले व्याज अनुदान उपलब्ध गराउँदै आएको छ ।
समितिले तोकेको मापदण्ड र कार्यविधिमा रहेर व्यवसाय गर्ने युवालाई कार्यक्रममा समावेश गरिने रामपुर नगरपालिका कृषि शाखा प्रमुख नारायणप्रसाद गैरेले जानकारी दिए । केही काम गर्न चाहना भएका युवा उद्यमीलाई व्यवसायबाट स्वरोजगार र आत्मनिर्भर बनाउन व्याज अनुदान उपलब्ध गराइएको छ । २१ वर्षदेखि ५९ वर्ष सम्मका युवालाई यस कार्यक्रममा समावेश गरिनेछ ।
आर्थिक वर्ष २०७६/०७७ देखि सुरु भएको यस कार्यक्रम प्रभावकारी बन्दै गएको छ । सुरुमा रु ५ लाखबाट व्याज अनुदान दिन थालेको नगरपालिकाले हाल भने रु ३० लाखसम्म अनुदान दिने गरेको छ । विदेश जाने तयारीमा रहेका, विदेशबाट फर्केका युवालाई गाउँमै बसेर व्यवसाय गर्न प्रोत्साहन गराउने उद्धेश्यले व्याज अनुदान कार्यक्रम ल्याइएको नगर प्रमुख रमणबहादुर थापा बताउँछन् ।
“युवाहरुलाई लक्षित गरेर ल्याइएको यस कार्यक्रममा केही उद्यम, व्यवसाय गर्छु भन्ने युवाका लागि सहज भएको छ, आफुले कारोबार गरेका नगरपालिकाभित्रका कुनैपनि बैंक तथा वित्तीय संस्थाबाट ऋण झिकेर व्यवसायमा लगानी गर्ने, बैंकको खातामा नगरपालिकाले व्याज बुझाउने कार्य गरिरहेको छ, यसले व्याज बुझाउने तनाव व्यवसायीमा हटेको छ” नगर प्रमुख थापाले भने ।
दुई वर्षसम्म युवा स्वरोजगार कार्यक्रममार्फत व्याज अनुदान प्राप्त गरी सकेका युवा उद्यमीहरुले पुनः कार्यक्रममा सहभागी भई व्याज अनुदानको लागि प्रस्ताव पेश गरेमा समितिले पुर्व सञ्चालित व्यवसायमा थप न्युनतम मापदण्ड पुरा गरी मापदण्ड अनुसारको कर्जा रकमा व्याज अनुदान दिनेछ ।
अनुगमन समितिले बेला बेलामा व्यवसायको अनुगमन गरी मापदण्ड अनुसार व्यवसाय सञ्चालन भए नभएको मुल्याङ्कन गरेर मात्रै सम्बन्धित व्यवसायीको बैंक खातामा उपलब्ध गराउँदै आएको नगरपालिकाले जनाएको छ । मापदण्ड अनुसार काम नगरेको समितिले ठहर गरेमा सो रकम रोक्का गरिनेछ ।
सम्बन्धित खवर
